Bikhra Hun Jab Main Khud Yahan Koi Mujhe Girae Kyun

bikhra huun jab main ḳhud yahan koi mujhe girae kyuun

pahle se raakh raakh huun phir bhi koi bujhae kyuun

iisa na vo nabi koi adna sa aadmi koi

phir bhi salib-e-dard ko sar pe koi uThaen kyuun

saare jo gham-gusar the kab ke raqib ban chuke

aise men doston koi apna ye gham sunae kyuun

yakta vo zat-e-akbari dil ye haqiro asghari

itni vasi.a shai bhala dil men mire samae kyuun

palta hamare ḳhuun se hai ishq magar adu se hai

apna nahin jo bevafa ham ko yuun azmae kyuun

sub.h ka vaqt aae to ḳhud hi bujhega ye charagh

is ko sahar se peshtar koi magar bujhae kyuun

jis par giri hai barq bhi jis pe hava ki hai nazar

shaḳhon men aisi ai ‘sahab’ ghar bhi koi banae kyuun

Leave a Comment