shoalon se mohabbat ki miri jaan men lagi aag
phir jaan se bhadak jism ke maidan men lagi aag
ye atish-e-gham hai ki dam-e-sard se apne
sar-chashma-e-khurshid-e-darakhshan men lagi aag
us huur ke kuche men bhare ham jo dam-e-garm
mardum ne kaha rauza-e-rizvan men lagi aag
khandan jo hua yaar hamen dekh ke giryan
logon ne kaha barq se baran men lagi aag
in rozon men hai rang jo ashkon ka gulabi
shayad ki mire dida-e-giryan men lagi aag
garmi se nagar ke tire gun aab hua dekh
bulbul ne pukara ki gulistan men lagi aag
naari hain jo pariyan ye sabab hai ki tumhare
nur-e-rukh-e-raushan se paristan men lagi aag
us atishin-ru ko ba-lab-e-bam jo dekha
aalam ne kaha gumbad-e-gardan men lagi aag
dariya men vo dhoya tha kabhi dast-e-hinai
hasrat se vahin panja-e-marjan men lagi aag
ghairon ki taraf jo nazar-e-mehr se dekha
ghairat se mire sina-e-sozan men lagi aag
kyuun kohkan-o-qais rahen mujh se na nalan
nalon se mire koh-o-bayaban men lagi aag
vo sokhta-dil huun main pas-az-marg jo guzra
marqad se mire yaar ke daman men lagi aag
‘matam’ hai kisi sokhta-dil ka asar-e-ah
be-vajh nahin kucha-e-janan men lagi aag
Leave a Reply