Nushur Wahidi
dil hai ki mohabbat men apna na paraya hai
kuchh soch ke us ne bhi divana banaya hai
jo vaqt ki guzra hai jazbat ke kuche men
kuchh raas nahin aaya kuchh raas bhi aaya hai
asan nahin ye aansu aaya hai jo palkon par
rag rag se lahu le kar dipak ye jalaya hai
ik rabt-e-hasin dekha be-rabti-e-alam men
hangama sahi lekin hangama sajaya hai
pahchan liye ham ne tevar gham-e-dauran ke
duniya men raha lekin dhoka nahin khaya hai
rahbar ho ki sha.er ho kya apni ḳhabar us ko
ḳhud kuchh bhi nahin sikha duniya ko sikhaya hai
naghma hai ‘nushur’ apna afsurda-e-gham lekin
ehsas ki mahfil men kuchh rang to aaya hai
Leave a Reply