Asad Raza
ham se divanon ko asri agahi Dasti rahi
khokhli tahzib ki farzangi Dasti rahi
sho.ala-e-nafrat to bhaḌka ek lamhe ke liye
muddaton phir shahr ko ik tirgi Dasti rahi
maut ki nagin se ab hargiz vo Dar sakta nahin
jis ko saari umr ḳhud ye zindagi Dasti rahi
main na jaane kitne janmon ka huun pyasa dosto
rah ke dariya men bhi mujh ko tishnagi Dasti rahi
aap ke honTon pe jo muddat se hai chha.i hui
dard men Duubi hui vo ḳhamushi Dasti rahi
ek tum ho dushmani bhi raas aa.i hai jise
aur ik main huun ki jis ko dosti Dasti rahi
har ghaḌi chehre pe jo chehre lagata hi raha
umr bhar us ko ‘asad’ be-chehragi Dasti rahi
Leave a Reply