Iqbal Tariq
musalsal imtihan se thak chuka huun
main ab umr-e-ravan se thak chuka huun
mujhe ab ḳhaak marqad men chhupa do
ki jism-e-na-tavan se thak chuka huun
koi to aa base dil men mire bhi
ab is ḳhali makan se thak chuka huun
ab apni zaat bhi hai bojh mujh par
main is koh-e-giran se thak chuka huun
mira rasta to ‘tariq’ kaT gaya par
tumhari dastan se thak chuka huun
Leave a Reply