jism ki qaid se sab rang tumhare nikal aa.e
meri dastak se to tum aur bhi pyare nikal aa.e
us ke paani ne diya hukm to ham Duub ga.e
us ki miTTi ne pukara to kinare nikal aa.e
ishq pahuncha jo mire jism ke darvaze par
ḳhair-maqdam ke liye ḳhuun ke dhare nikal aa.e
us ki ankhon ne yaqin kuchh na dilaya phir bhi
sher kahne ke liye kuchh to ishare nikal aa.e
shahr ki bhiiḌ men gum ho ga.e saare ma.ashuq
ḳhair se ishq miyan tum to hamare nikal aa.e
‘farhat-ehsas’ to bas Duub ga.e the lekin
beach manjdhar men do-char kinare nikal aa.e
Leave a Reply