vo ro.ab-e-husn tha us ka salam bhuul gaya
kara saka na ta.aruf men naam bhuul gaya
idhar udhar ki hui ḳhuub guftugu us se
bahut zaruri tha sab se jo kaam bhuul gaya
gham-e-jahan ne kiya is qadar ḳharab ki main
jo doston men gizari thi shaam bhuul gaya
zaban-e-ghair se main tera tazkira sun kar
zara si der men sab ehtiram bhuul gaya
rakha jo us ne mohabbat se haath kandhe par
jo dil men dard tha mere tamam bhuul gaya
ye kaisi rah-e-tamanna thi mere pesh-e-nazar
chala to chal ke faqat chand gaam bhuul gaya
main us ki zaat men gum is tarah hua ‘nasir’
kahan ke hosh o ḳhirad sab kalam bhuul gaya
Leave a Reply