Wo Roab-E-Husn Tha Us Ka Salam Bhul Gaya

vo ro.ab-e-husn thā us kā salām bhuul gayā

karā sakā na ta.āruf meñ naam bhuul gayā

idhar udhar kī huī ḳhuub guftugū us se

bahut zarūrī thā sab se jo kaam bhuul gayā

ġham-e-jahāñ ne kiyā is qadar ḳharāb ki maiñ

jo dostoñ meñ gizārī thī shaam bhuul gayā

zabān-e-ġhair se maiñ terā tazkira sun kar

zarā sī der meñ sab ehtirām bhuul gayā

rakhā jo us ne mohabbat se haath kāñdhe par

jo dil meñ dard thā mere tamām bhuul gayā

ye kaisī rāh-e-tamannā thī mere pesh-e-nazar

chalā to chal ke faqat chand gaam bhuul gayā

maiñ us kī zaat meñ gum is tarah huā ‘nāsir’

kahāñ ke hosh o ḳhirad sab kalām bhuul gayā

Leave a Comment