vahi tavil si rahen safar vahi tanha
baḌa hujum hai phir bhi hai zindagi tanha
tire baghair ujale bhi tira-saman hain
bhaTak rahi hai nigahon ki raushni tanha
jahan jahan bhi ga.i gham ke as-pas rahi
kisi maqam pe dekhi nahin ḳhushi tanha
shu.ur-e-did ka anjam dekhiye kya ho
hujum-e-vahm-o-guman aur agahi tanha
ḳhud apne shahr men bhi ab to ham kuchh aise hain
dayar-e-ghair men jaise ik ajnabi tanha
kisi ne saath nibaha bhi to bichhaḌne ko
rahi hai apne parayon men zindagi tanha
ḳhud apne-ap se beganagi ka aalam hai
sharik-e-bazm-e-nigaran bhi hain ‘rishi’ tanha
Leave a Reply