Mohammad Ismail Aasi Aarwi
chahe jo haal bhi ho un ki nazar hone tak
ham jiye ja.enge aahon men asar hone tak
be-ḳhudi naam hai ehsas-e-ḳhudi ka shayad
varna kuchh aur tha mansur ḳhabar hone tak
sabr se kaam le ai dil is andhere se na Dar
zulmat-e-shab hai sapedi-e-sahar hone tak
jab jo chahen vo kahen apne ko vaa.iz lekin
bartari mujh ko to hasil hai bashar hone tak
haa.e vo husn-e-yaqin aah vo ummid-e-karam
muntazir tha tira bimar sahar hone tak
yuun to jiina hai ba-har-hal magar ai ‘asi’
zindagi asl men hai soz-e-jigar hone tak
Leave a Reply