jab na gumbad na sada raqs men ho
kya na ho raqs men kya raqs men ho
aks ho apni dhamalen oḌhe
aa.ina apni jagah raqs men ho
taliyan piiT rahe hon patte
aur peḌon pe hava raqs men ho
Dubne vaale hon sahil sahil
mauj-dar-mauj ghaḌa raqs men ho
rat-bhar ayaten gaate rahiye
kya ḳhabar koi dua raqs men ho
kya ḳhabar raqs men ho qibla-e-jan
dam-ba-dam sajda ada raqs men ho
ek darvesh paḌhe jaa.e ghazal
ek darvesh sada raqs men ho
raqs men lamha vo kab aata hai
paanv sakit hon faza raqs men ho
aag si shai ho koi rag rag men
ek ik ang mira raqs men ho
saaya kab TuuT ke yuun nachta tha
aaj mumkin hai diya raqs men ho
TuuT bhi ja.un pata bhi na chale
kam se kam itna nasha raqs men ho
Leave a Reply