musavviri men nafas phunkne ka fan bhi to ho
ki pairahan ho agar saz-e-pairahan bhi to ho
to sirf aks nahin ik sahifa-e-fan hai
is aa.ine men kabhi garmi-e-badan bhi to ho
vo shayad is liye tasvir ban ke baiTha raha
faqat suḳhan hi nahin hasrat-e-suḳhan bhi to ho
main aabi rang men thoḌi si aab chahta huun
agar nigah paḌe aankh men chubhan bhi to ho
ye soch kar use gul-dan men saja na sake
vo phuul hai to use sohbat-e-chaman bhi to ho
Leave a Reply