noon-meem-rashid

Guman Ka Mumkin- Jo Tu Hai Main Hun

karim suraj

jo thande patthar ko apni golai

de raha hai

jo apni hamvari de raha hai

(vo thanDa patthar jo mere manind

bhure sabzon men

duur reg o hava ki yadon men lotta hai)

jo bahte paani ko apni dariya-dili ki

sarshari de raha hai

vahi mujhe janta nahin

magar mujhi ko ye vahm shayad

ki ap-apna subut apna javab huun main!

mujhe vo pahchanta nahin hai

ki meri dhimi sada

zamane ki jhiil ke dusre kinare

se aa rahi hai

ye jhiil vo hai ki jis ke uupar

hazaron insan

ufuq ke mutavazi chal rahe hain

ufuq ke mutavazi chalne valon ko paar laati hain

vaqt lahren

jinhen tamanna, magar, samavi khiram ki ho

inhi ko patal zamzamon ki sada sunati hain

vaqt lahren

unhen Duboti hain vaqt lahren!

tamam mallah us sada se sada hirasan, sada gurezan

ki jhiil men ik umuud ka chor chhup ke baitha hai

us ke gesu ufuq ki chhat se latak rahe hain

pukarta hai: ”ab aao, aao!

azal se main muntazir tumhara

main gumbadon ke tamam razon ko janta huun

darakht minar burj ziine mire hi sathi

mire hi mutavazi chal rahe hain

main har havai-jahaz ka akhiri basera

samundaron par jahaz-ranon ka main kinara

ab aao, aao!

tumhare jaise kai fasanon ko main ne un ke

abad ke aghosh men utara”

tamam mallah is ki avaz se gurezan

ufuq ki shah-rah-e-mubtazil par tamam sahme hue khiraman

magar samavi khiram vaale

jo past o baala ke astan par jame hue hain

umuud ke is tanab hi se utar rahe hain

isi ko thame hue bulandi pe chadh rahe hain!

isi tarah main bhi saath in ke utar gaya huun

aur aise sahil par aa laga huun

jahan khuda ke nishan-e-pa ne panah li hai

jahan khuda ki zaiif ankhen

abhi salamat bachi hui hain,

yahi samavi khiram mera nasib nikla

yahi samavi khiram jo meri aarzu tha

magar na jaane

vo rasta kyuun chuna tha main ne

ki jis pe khud se visal tak ka guman nahin hai?

vo rasta kyuun chuna tha main ne

vo ruk gaya hai dilon ke ibham ke kinare?

vahi kinara ki jis ke aage guman ka mumkin

jo tu hai main huun!

magar ye sach hai

main tujh ko paane ki (khud ko paane kii) aarzu men nikal pada tha

us ek mumkin ki justuju men

jo tu hai main huun

main aise chehre ko DhunDhta tha

jo tu hai main huun

main aisi tasvir ke taaqub men ghumta tha

jo tu hai main huun!

main is taaqub men

kitne aghaz gin chuka huun

(men us se Darta huun jo ye kahta

hai mujh ko ab koi Dar nahin hai)

main is taaqub men kitni galiyon se,

kitne chaukon se,

kitne gunge musass se, guzar gaya huun

main is taaqub men kitne baghon se,

kitni andhi sharab raton se,

kitni banhon se,

kitni chahat ke kitne bifre samundaron se

guzar gaya huun

main kitni hosh o amal ki shamon se,

kitne iman ke gumbadon se

guzar gaya huun

main is taaqub men kitne aghaz kitne anjam gin chuka huun

ab is taaqub men koi dar hai

na koi aata hua zamana

har ek manzil jo rah gai hai

faqat guzarta hua fasana

tamam raste, tamam bujhe saval, be-vazn ho chuke hain

javab, tarikh ruup dhare

bas apni takrar kar rahe hain

javab ham hain javab ham hain

hamen yaqin hai javab ham hain

yaqin ko kaise yaqin se dohra rahe hain kaise!

magar vo sab aap apni zid hain

tamam, jaise guman ka mumkin

jo tu hai main huun!

tamam kunde (tu janti hai)

jo sath-e-dariya pe saath dariya ke tairte hain

ye jante hain ye hadse

ki jis se un ko,

(kisi ko) koi mafar nahin!

tamam kunde jo sath-e-dariya pe tairte hain,

nahang banna ye un ki taqdir men nahin hai

(nahang ki ibtida men hai ik nahang shamil

nahang ka dil nahang ka dil!)

na un ki taqdir men hai phir se darakht banna

(darakht ki ibtida men hai ik darakht shamil

darakht ka dil darakht ka dil!)

tamam kunde ke samne band vapsi ki

tamam rahen

vo sath-e-dariya pe jabr-e-dariya se tairte hain

ab un ka anjam ghaat hain jo

sada se aghosh va kiye hain

ab un ka anjam vo safine

abhi nahin jo safina-gar ke qayas men bhi

ab un ka anjam

aise auraq jin pe harf-e-siyah chhapega

ab un ka anjam vo kitaben

ki jin ke qaari nahin, na honge

ab un ka anjam aise surat-garon ke parde

abhi nahin jin ke koi chehre

ki un pe aansu ke rang utren,

aur in men ainda

un ke ruuya ke naqsh bhar de

gharib kundon ke samne band vapsi ki

tamam rahen

baqa-e-mauhum ke jo raste khule hain ab tak

hai un ke aage guman ka mumkin

guman ka mumkin jo tu hai main huun,

jo tu hai men huun

More Poems

Leave a Comment