Aslam Mahmood
tu apne shahr-e-tarab se na puchh haal mira
mujhe aziiz hai ye kucha-e-malal mira
abhi to hona hai ik raqs-e-be-misal mira
diye ki lau se abhi dekhna visal mira
vo dard huun koi chara nahin hai jis ka kahin
vo zaḳhm huun ki hai dushvar indimal mira
to kya ye vaqt yunhi raundta rahega mujhe
Darata rahta hai mujh ko yahi saval mira
javaz rakhta huun main apne zinda hone ka
ki ek ḳhvab se hai silsila bahal mira
hava ki dosti achchhi na dushmani achchhi
charagh pahle na tha ab hai ham-ḳhayal mira
main aks ban ke isi se ubharna chahta huun
so mere a.ina-gar aa.ina ujaal mira
lahu ki nazr hua ek ek ḳhvab-e-numu
hava ke saath gaya ḳhema-e-ḳhayal mira
kabhi main sho.ala tha ab sirf raakh huun ‘aslam’
halak kar ke raha mujh ko ishti.al mira
Leave a Reply