bayan ai ham-nashin gham ki hikayat aur ho jaati
zara ham ḳhasta-halon ki tabi.at aur ho jaati
nasihat hazrat-e-va.iz ki sunte bhi to kya hota
yahi hota ki ham ko un se vahshat aur ho jaati
bahut achchha hua aansu na nikle meri ankhon se
bapa mahfil men ik taaza qayamat aur ho jaati
taḌap kar dil ne manzil par mujhe chaunka diya varna
ḳhuda jaane ki tai kitni masafat aur ho jaati
tumhare naam se hai bekason ka naam vabasta
bula lete agar dar par to nisbat aur ho jaati
bahut saste rahe nichi nazar se dil liya tum ne
agar nazren bhi mil jatin to qimat aur ho jaati
sharaf baḳhsha hai tum ne aaj mujh ko ham-kalami ka
kahun kuchh dil ki baat itni ijazat aur ho jaati
zahe qismat navaza hai javab-e-ḳhat se ‘vasif’ ko
dikhate ik jhalak itni inayat aur ho jaati
Leave a Reply