Sine Ka Dagh Dagh Farozan Kiye Hue

siine kā daaġh daaġh farozāñ kiye hue

baiThe haiñ bazm-e-dost charāġhāñ kiye hue

o jaane vaale dil ko bayābāñ kiye hue

aanā paḌegā chaak garebāñ kiye hue

yārab junūn-e-tark-e-mohabbat kī ḳhair ho

vo aa rahe haiñ azm-e-dil-o-jāñ kiye hue

baiThe haiñ bazm-e-dost meñ āshuftagān-e-ġham

ashk-e-chakīda zīnat-e-mizhgāñ kiye hue

sargarm-e-iltifāt hai phir chashm-e-munfa.il

palkoñ kī oT hashr kā sāmāñ kiye hue

ab ham haiñ aur hasrat-e-fasl-e-bahār ‘rāz’

muddat huī hai chaak garebāñ kiye hue

Leave a Comment