siine ka daagh daagh farozan kiye hue
baiThe hain bazm-e-dost charaghan kiye hue
o jaane vaale dil ko bayaban kiye hue
aana paḌega chaak gareban kiye hue
yarab junun-e-tark-e-mohabbat ki ḳhair ho
vo aa rahe hain azm-e-dil-o-jan kiye hue
baiThe hain bazm-e-dost men ashuftagan-e-gham
ashk-e-chakida zinat-e-mizhgan kiye hue
sargarm-e-iltifat hai phir chashm-e-munfa.il
palkon ki oT hashr ka saman kiye hue
ab ham hain aur hasrat-e-fasl-e-bahar ‘raz’
muddat hui hai chaak gareban kiye hue
Leave a Reply