Tanveer Ahmad Alvi
vahi jo raah ka patthar tha be-tarash bhi tha
vo ḳhasta-jan hi kabhi a.ina-qimash bhi tha
lahu ke phuul rag-e-jan men jis se khilte the
vahi to shisha-e-dil tha ki paash paash bhi tha
bikhar ga.i hain jahan TuuT kar ye chaTTanen
yahin to phuul koi sahib-e-farash bhi tha
uTha.e phirta tha jis ko salib ki surat
vahi vajud to ḳhud us ki zinda laash bhi tha
palak jhapakne men kuchh ḳhvab TuuT jaate hain
jo but-shikan hai vahi lamha but-tarash bhi tha
vo harf-e-naz ki resham ka taar kahiye jise
vahi to dil ke liye ik hasin ḳharash bhi tha
ada-e-husn jise kahiye be-ruḳhi ‘tanvir’
usi ki tarz-e-taghaful ka raaz faash bhi tha
Leave a Reply