Chashm-E-Tar Le Ke Jo Us Ghar Se Nikal Jaun Main

Neelam Malik

chashm-e-tar le ke jo us ghar se nikal ja.un main

sab badal jaa.e jo manzar se nikal ja.un main

zindagi mujh pe musallat hai kisi Dar ki tarah

kaise ji pa.un jo is Dar se nikal ja.un main

main yahan qaid huun murat ki tarah sang-tarash

tu agar chahe to patthar se nikal ja.un main

phir to aage ka.i nadiyan ka.i chashme honge

bas shab-o-roz ke asthar se nikal ja.un main

ḳhair mujh ko jo pukare kabhi bahar ki taraf

apne andar ke har ik shar se nikal ja.un main

dil-e-yakta jo mira saath gavara hi nahin

ruuh ban kar tire paikar se nikal ja.un main

jism zindan hi sahi soch magar bara-dari

jis taraf chahun kisi dar se nikal ja.un main