Tujhko Sochun Main Su-Ba-Su Ho Kar

tujh ko sochun main su-ba-su ho kar

main to bas rah gai huun tu ho kar

ye tire lams ka karishma hai

phail jaati huun rang-o-bu ho kar

tu na ho to main banjh mitti huun

raakh ho ja.un be-numu ho kar

hai tiri qaid men hi azadi

Dhanp le mujh ko chaar su ho kar

aaina huun tire vajud ka main

aa kabhi dekh ru-ba-ru ho kar

‘naz’ ke lab pe har ghadi raqsan

tu hi rahta hai guftugu ho kar

Leave a Comment