ghar se ghar tak ka rasta na mila
koi bhi ḳhud men jhankta na mila
sab ke hamrah sab ke saa.e the
shahar men koi devta na mila
kitne honTon ka lams yaad rahe
ek bhi naqsh der-pa na mila
raushni ke safir lauT ga.e
shahr-dar-shahr rat-jaga na mila
tang tha zaat ka hisar bahut
koi rasta farar ka na mila
kitne aansu nichoḌ kar dekhe
kho gaya tha jo qahqaha na mila
ham hi the apne as-pas ‘nazar’
raah men koi dusra na mila
Leave a Reply