dekh na paaya jis paikar ko va.adon ki angna.i men
DhunD raha huun us ka chehra ḳhvabon men tanha.i men
kaise ho ma.alum ye aḳhir purva.i ke jhonkon ko
phulon par kya biit chuki hai shaḳhon ki angḌa.i men
Dhalte suraj ki a.ankhon ne aḳhir mujh ko DhunD liya
chhup na saka main bhi pipal ke saa.e ki lamba.i men
pa kar teri saans ki aahaT dil yuun machla jaa.e hai
jaise shor macha.e gagar panghaT ki gahra.i men
har ik shaḳhs ke aage karun kyuun shikve ki divar khaḌi
sirf ik tera haath hai mere lahje ki rusva.i men
‘shariq’ Daal do a.ankhon par tum apni palkon ka ye ghilaf
saara shahr pahunch gaya hai sannaTe ki khaa.i men
Leave a Reply