uThe tiri mahfil se to kis kaam ke uTThe
dil thaam ke baiThe the jigar thaam ke uTThe
dam bhar mire pahlu men unhen chain kahan hai
baiThe ki bahane se kisi kaam ke uTThe
us bazm se uTh kar to qadam hi nahin uThta
ghar sub.h ko pahunche hain kahin shaam ke uTThe
hai rashk ki ye bhi kahin shaida na hon us ke
turbat se bahut log mire naam ke uTThe
afsana-e-husn us ka hai har ek zaban par
parde na kabhi jis ke dar-o-bam ke uTThe
aghaz-e-mohabbat men maze dil ne uḌaa.e
puchhe to koi ranj bhi anjam ke uTThe
dil nazr men de aa.e ham ik shoḳh ko ‘beḳhud’
bazar men jab daam na is jaam ke uTThe
Leave a Reply