aaj sarhad pe khamosh topon ke honton pe
papdi ki tah bhi chatakh kar giri hai
har ik roz subh savere se tarikiyon ki tahon tak
akela hi chalta hai suraj
udasi se har aankh ko apni janib tavajjoh ki khatir
bulata hai lekin
nigahen milane ka har hausla
har badan men
faqat siskiyon ki tarah jagta hai
ab faqat aabru ka dhuan kohar ban ke ruka hai
bas ab bulbulon ke tarannum men bhi
nauha-e-zindagi ke sitam-khez tufan hain
ab faqat mere apne chahiton ki lashon ke ambar hain
ab to khar bhi yahan hinhinate nahin
jang-bandi nahin sarhaden bhi nahin
ai miri mujh se ruthi hui
mere padma ki ai zinda-tar sar-zamin
meri ankhon tire asmanon
tiri aur miri sarhadon ke vo sab fasle
jo magar qurbaton ke siva kuchh na the
aaj kyuun aankh men ashk ban ke ruke hain
bhala kyuun mujhe
teri qurbat ke sayon ko dhundlahaton men badalte hue
dekhne ke liye zinda rahna pada hai
Leave a Reply