mil mil ke doston ne vo di hai dagha mujhe
ab ḳhud pe bhi nahin hai guman-e-vafa mujhe
uf ibtida-e-shauq ki ma.asum justuju
har phuul tha chaman men tira naqsh-e-pa mujhe
ai khinchne vaale dekh miri be-panahiyan
aati hai dushmanon se bhi bu-e-vafa mujhe
duniya tumhen aziiz hai mere siva magar
aalam hai na-pasand tumhare siva mujhe
karti nahin ubuur tumhen meri justuju
kya kar diya hai tum ne ye kya ho gaya mujhe
vaz.an bhi hans paḌa huun to phir dil se muddaton
aa.i karahne ki sada par sada mujhe
phir baat baat men hai lachak iltifat ki
kya phir dikhaoge koi ḳhvab-e-vafa mujhe
ye hai fughan ka zor to phir vo chuka qafas
kar degi meri sho.ala-nava.i riha mujhe
kotahi-e-nazar se ahata na ho saka
milne ko yuun mila hai buton men ḳhuda mujhe
meri vafa pe aap hi chin-bar-jabin nahin
main ḳhud bhi sochta huun ye kya ho gaya mujhe
jis mudda.a-e-shauq ki daryaft hain huzur
mayus kar raha hai vahi mudda.a mujhe
ik ziiq ik azaab ik andoh ik taḌap
tum ne ye dil ke naam se kya de diya mujhe
un ko ganva ke haal raha hai ye muddaton
aaya ḳhayal bhi to baḌa gham hua mujhe
iflas ke shabab-e-muqaddas men barha
aaya hai puchhne mire ghar par ḳhuda mujhe
‘ehsan’ apne vaqt pe maut aa.egi magar
jiine ka mashvara nahin deti faza mujhe
Leave a Reply