Naresh Kumar Shad
raunaq baḌhegi ru-e-nashat-e-jamal ki
thoḌi si gard Daal do is par malal ki
deti rahi fareb unhen bhi tiri vafa
aghaz men bhi jin ko ḳhabar thi ma.aal ki
ab is maqam par hai miri zindagi jahan
kaifiyyat ek si hai nashat o malal ki
allah-re jazb-e-did ki ahl-e-nigah se
ḳhud husn bhiik maang raha hai jamal ki
dil phir bhi aa gaya gham-e-dauran ke pher men
har-chand maslahat ne baḌi dekh-bhal ki
phulon ki dilkashi ho ki taron ki raushni
parchha.iyan hain sab mire husn-e-ḳhayal ki
Leave a Reply