Shahid Kamal
jo is zamin pe rahte the asman se log
kahan ga.e vo mire saare mehrban se log
ye be-charagh si basti ye be-sada galiyan
har ek samt ye ujḌe hue makan se log
sar-e-navishta-e-taqdir ḳhvab ki surat
likhe hain ret pe kuchh harf-e-ra.egan se log
ki ye asar to nahin un ki faqa-masti ka
phir aaj tang hue hain jo apni jaan se log
kuchh is men hasb-e-zarurat kiye ga.e shamil
kuchh ham ne hazf kiye apni dastan se log
abhi na ḳhatm hua tha fasana-e-hasti
gurez karne lage apne darmiyan se log
paḌi hai ret pe TuuTi hui vo kashti-e-ḳhak
ki uḌ rahe hain havaon men badban se log
tujhe to apni hi jaan ki paḌi hui hai ‘kamal’
guzar rahe hain yahan par kis imtihan se log
Leave a Reply