kaun tanhai ka ehsas dilata hai mujhe
ye bhara shahr bhi tanha nazar aata hai mujhe
jaane kis mod pe kho jaae andhere men kahin
vo to khud saaya hai jo raah dikhata hai mujhe
us ki palkon se dhalak jaun na aansu ban kar
khvab ki tarah jo ankhon men sajata hai mujhe
aks ta aks badal sakti huun chehra main bhi
mera maazi magar aina dikhata hai mujhe
vo bhi pahchan na paaya mujhe apnon ki tarah
phuul bhi kahta hai patthar bhi batata hai mujhe
ajnabi lagne laga hai mujhe ghar ka angan
kya koi shahr-e-nigaran se bulata hai mujhe
kisi rut men bhi miri aas na tuuti ‘sarvat’
har naya jhonka khalaon men udata hai mujhe