habs-e-darun pe jism-e-giran-bar sang tha
vahshat pe meri arsa-e-afaq tang tha
kuchh duur tak sahab-e-rifaqat raha rafiq
phir ehtamam-e-barish-e-tir-o-tafang tha
sahmi hui faza-e-ghazalan ke ru-ba-ru
jangal tha qahqahe the ḳhuda tha main dang tha
ab shahr-e-justuju men tire baad kuchh nahin
abadi-e-badan men jo dil tha malang tha
ji ye kare hai aaj ki tanha ji.en maren
kab mere iztirab ka ye rang-Dhang tha
har shaam muzmahil si savera bujha bujha
tujh se pare jo dekha yahi ek rang tha
Leave a Reply