Badli Hui Nazron Se Ab Bhi Andaz Purane Mange Hai

Qadir Siddiqi

badli hui nazron se ab bhi andaz purane mange hai

dil mera kitna murakh hai vo biite zamane mange hai

muddat hui dil taraj hue muddat hui rishton ko TuuTe

duniya hai ki zalim aaj bhi vo rangin fasane mange hai

dil hai ki vo hai murjhaya sa har aas ka chehra hai utra

har dost mira phir bhi mujh se ḳhushiyon ke ḳhazane mange hai

halat ne aansu baḳhshe hain taqdir men rona likha hai

aur vaqt na jaane kyon mujh se honTon pe tarane mange hai

aql aur ḳhirad donon mujh ko deti hain dua.en jiine ki

ehsas mira mujh se lekin marne ke bahane mange hai

basti kaisi mahfil kaisi kaise kuche kaise bazar

duniya se jahan chhup kar ro le dil aise Thikane mange hai

har chaah ka badla chahat ho har pyaar ka pyara ho anjam

kuchh soch zara tu duniya se kya chiiz divane mange hai