Shayar Jamali
na koi phuul na phal aur na koi patta tha
main jis ke saa.e men baiTha vo peḌ nanga tha
chamak damak men tumhara ḳhulus hiira tha
mira vajud bahar-hal ek shisha tha
ajiib shahr se guzra main raat ai logo
har ek shaḳhs ke chehre pe mera chehra tha
vo aadmi jise apna samajh liya tu ne
vo bad-nasib to apne liye paraya tha
mira vajud andheron men gharq tha lekin
jahan jahan bhi koi zaḳhm tha ujala tha
Leave a Reply