Mohammad Shahid Firoz
har roz pahle roz se behtar mila hai ḳhauf
aisa nahin ki ek hi jaisa raha hai ḳhauf
jis ne tumhari niind ki duniya ujaaḌ di
mujh ko bhi ek aisi hi avaz ka hai ḳhauf
mere mizaj ka hai mira aks ḳhadd-o-ḳhal
sab se alag-thalag huun main sab se juda hai ḳhauf
ye ka.enat donon ki marzi se hai bani
teri ata hai zindagi meri ata hai ḳhauf
apna bhi haath chhune se Dar jaa.e aadmi
meri samajh men aa chuka kitna bura hai ḳhauf
teri ata se baḌh ke to mumkin nahin hai dost
itna hi kha raha huun main jitna diya hai ḳhauf
mere liye hai habs ka mausam bala-e-jan
jaise diye ke vaste biphri hava hai ḳhauf
ye soch mere vaste hai mas.ala bani
tujh men ḳhuda ka ḳhauf hai ya phir ḳhuda hai ḳhauf
ik roz shahr-e-yar pe ban ja.ega azaab
achchha hai ahl-e-shahr men jo pal raha hai ḳhauf
‘shahid’ adam ka hona aur na hona jaan le
ya.ani vajud raushni hai aur ḳhala hai ḳhauf
Leave a Reply