Mohsin Bhopali
nazar mila ke zara dekh mat jhuka ankhen
baḌha rahi hain nigahon ka hausla ankhen
jo dil men aks hai ankhon se bhi vo chhalkega
dil a.ina hai magar dil ka aa.ina ankhen
vo ik sitara tha jaane kahan gira hoga
ḳhala men DhunD rahi hain na jaane kya ankhen
gham-e-hayat ne fursat na di Thaharne ki
pukarti hi rahi hain mujhe sada ankhen
ye us ka tarz-e-taḳhatub bhi ḳhuub hai ‘mohsin’
ruka ruka sa tabassum ḳhafa ḳhafa ankhen
Leave a Reply