Nazar Mila Ke Zara Dekh Mat Jhuka Aankhen

nazar milā ke zarā dekh mat jhukā āñkheñ

baḌhā rahī haiñ nigāhoñ kā hausla āñkheñ

jo dil meñ aks hai āñkhoñ se bhī vo chhalkegā

dil ā.īna hai magar dil kā aa.inā āñkheñ

vo ik sitāra thā jaane kahāñ girā hogā

ḳhalā meñ DhūñD rahī haiñ na jaane kyā āñkheñ

ġham-e-hayāt ne fursat na dī Thaharne kī

pukārtī hī rahī haiñ mujhe sadā āñkheñ

ye us kā tarz-e-taḳhātub bhī ḳhuub hai ‘mohsin’

rukā rukā sā tabassum ḳhafā ḳhafā āñkheñ

Leave a Comment