phuul ḳhushbu shaam savan shaghl-e-paimana chale
jis ko chalna hai hamare saath mai-ḳhana chale
yuun chale lahra ke jaise mauj bal khaa.i hui
ya sahab-e-mast jaise chaal mastana chale
zulf sumbul phuul lab ruḳhsar par rang-e-shafaq
junbishen ankhon ki palkon men ki paimana chale
us se kah do pattharon ke but men Dhal ja.enge sab
ab na ye jadu-e-chashm-e-mai-e-faroshana chale
shukriya ahbab ka jin ki mohabbat ke tufail
mujh se kuchh aage hi aage mera afsana chale
is gali men ‘mir’ ka ham-sar na aaya phir ‘shamim’
vo jo qatil ko dua de kar faqirana chale
Leave a Reply