dil mange hai mausam phir ummidon ka
chaar taraf sangit racha ho jharnon ka
ham ne bhi taklif uthai hai akhir
aap bura kyuun manen sachchi baton ka
jaane ab kyuun dil ka panchhi hai gum-sum
jab pedon par shor macha hai chidiyon ka
raat gae tak raah vo meri dekhega
mujh par hai ik khauf sa taari rahon ka
mere mathe par kuchh lamhe utre the
ab bhi yaad hai zaiqa us ke honton ka
puure chand ki raat magar khamoshi hai
mausam to hai bhigi bhigi baton ka
Leave a Reply