Zafar Iqbal
aisa vo be-shumar-o-qatar intizar tha
pahli hi baar dusri baar intizar tha
khamoshi-e-khizan thi chaman-dar-chaman tamam
shakh-o-shajar men shor-e-bahar intizar tha
dekha to khalvat-e-khas-o-khashak khvab men
raushan koi charagh-e-sharar intizar tha
bahar bhi gard umiid ki udti thi duur duur
andar bhi charon-samt ghubar intizar tha
phaile hue vo ghaas ke takhte na the vahan
dar-asl ek silsila-var intizar tha
koi khabar thi amad-o-imkan-e-subh ki
aur us ke ird-gird hisar intizar tha
kis ke guman men the nae mausamon ke rang
kis ka mire siva sarokar intizar tha
umda hua hujum-e-tamasha tha daen-baen
tanha thiin ankhen aur hazar intizar tha
chakkar the paanv men koi sham-o-sahar ‘zafar’
uupar se mere sar pe savar intizar tha
Leave a Reply