Shaz Tamkanat
dil-shikasta hue TuuTa hua paiman bane
ham vahi hain jo tumhen dekh ke anjan bane
chand yaden miri zanjir-e-shab-o-roz banin
chand lamhe mire kho.e hue ausan bane
vo bhi kya fasl thi kya sho.ala-e-ḳhirman tha buland
vo bhi kya din the ki daman se gareban bane
in ki duuri ka bhi ehsan hai miri sanson par
mujh se is tarah vo bichhḌe ki nigahban bane
ahl-e-sahil se nadamat si nadamat hai ki ham
ek kashti-e-tah-e-ab ka saman bane
haa.e kya aas thi kya kya na tumhen banna tha
tum bane bhi to mire dard ki pahchan bane
ghar sajana to kuja ‘shaz’ luTa bhi na sakun
in se shikva hai ki vo kyuun mire mehman bane
Leave a Reply