na.i faza men rahe ham na.e safar men rahe
ye aur baat ki apne hi bal-o-par men rahe
hava thi apni muḳhalif ki tirgi thi harif
charagh ban ke jale aur rahguzar men rahe
mazaq-e-dar-ba-dari har qadam ke saath raha
safar men jab na rahe ḳhvahish-e-safar men rahe
muḳhalifat men kisi ki jo tere saath hue
ye mat samajh ki tere halqa-e-asar men rahe
tamasha dekhne bhi log aa hi jaate hain
saḌak pe ḳhalq-e-ḳhuda ho to kaun ghar men rahe
Leave a Reply