mire ḳhvabon men ḳhayalon men mire paas raho
tum mire saare savalon men mire paas raho
mere qatil mire dildar masiha mere
zaḳhm-o-marham ke havalon men mire paas raho
sham-e-ruḳhsar liye gesu-e-ḳhamdar liye
sab andheron men ujalon men mire paas raho
kabhi ḳhushbu kabhi saaya kabhi paikar ban kar
sabhi hijron men visalon men mire paas raho
ho tumhin juuhi tumhin roli tumhen parvati
husn-e-ḳhuban ki misalon men mire paas raho
apni palkon pe sajae hue namnak charagh
dam-e-aḳhir ke sambhalon men mire paas raho
Leave a Reply