Khalid Malik Sahil
main sharmsar huun apne zamir ke aage
ki haath ḳhali tha mera faqir ke aage
mira yaqin tha hadd-e-guman ke andar
kabhi bhi socha nahin hai lakir ke aage
koi to jazba tha mahjur ke ḳhayalon men
pighal rahi thiin salasil asiir ke aage
charagh-e-sahari tha lekin ajiib raushan tha
chamak raha tha vo mah-e-munir ke aage
main kaise us ke likhe par yaqin kar leta
qalam bhi girvi tha jis ka amiir ke aage
har ek shaḳhs tha kamzor-o-natavan ‘sahil’
badan-darida tha har ik sharir ke aage
Leave a Reply