tujh se bahut qarib bhi tanha bhi the hamin
the abru-e-ishq pa rusva bhi the hamin
ankhon men khuun tha ki zamin thi lahu lahu
zanjir-e-gham pahan ke tamasha bhi the hamin
har har qadam pe ik nai divar thi khadi
us raat ke safar men ujala bhi the hamin
maalum tha ye ishq nahin maat ka hai khel
paspa hue the ham hi havala bhi the hamin
maalum tha ki vahshaten apni bisat hain
maalum tha ki shaam ka taara bhi the hamin
ankhon men khvab chubhte rahenge tamam umr
ye dard-e-la-dava tha masiha bhi the hamin
ab yaad bhi na aao ki vaada bhi tha yahi
dasht-e-bala men vaada-e-farda bhi the hamin
ai subh-e-nau-bahar kabhi tu idhar bhi aa
ahbab jante hain ki tujh sa bhi the hamin
Leave a Reply