Syed Ahmed Shameem
nafas nafas ki mili hai mujhe saza kaisi
ye ret ret bikharti hui ana kaisi
guzishta zaḳhmon ke Tanke tamam TuuT ga.e
koi bata.e ki chalne lagi hava kaisi
sakun mile kisi lamha na ye bikhar jaa.e
ata hui hai mujhe zindagi ḳhuda kaisi
kabhi kabhi vo mujhe sun ke chaunk uTThega
hai jangalon men bhaTakti hui sada kaisi
‘shamim’ aap to qaa.il the chup pighalne ke
labon pe aaj sisakti hui sada kaisi
Leave a Reply