Poet
jigar ko chaak ki dil ko lahu lahu kiije
hayat ko kisi unvan surḳh-ru kiije
nahin hai hausla mar mar ke zinda rahne ka
to kaun kahta hai jiine ki aarzu kiije
hai chaak chaak bahut zindagi ka pairahan
ḳhuda ke vaste kuchh koshish-e-rafu kiije
lahu se pahle gulistan ko kijiye sairab
phir us ke ba.ad tamanna-e-rang-o-bu kiije
tumhari bazm men aa.i kahan se ye raunaq
nazar mila ke zara ham se guftugu kiije
ba-faiz-e-ishq taqaddus-ma.ab hain ham log
hamara zikr bhi kiije to ba-vazu kiije
qalam uThe to rahe azmat-e-qalam ka ḳhayal
ai ‘mansha’ yunhi sada hifz-e-abru kiije
Leave a Reply