Wae Qismat Ki Qarib Usne Na Aana Chaha

Qadir Siddiqi

vaa.e qismat ki qarib us ne na aana chaha

umr bhar ham ne jise apna banana chaha

kya kahen us ko gham-e-duniya ne kitna ghera

ham ne jis dil ko tire gham se sajana chaha

kar diya aur bhi mad.hosh zamane ne use

tere divane ne jab hosh men aana chaha

ho ga.i aur siva lazzat-e-gham ki tasir

jab kabhi ham ne tire gham ko bhulana chaha

vaqt ke sho.alon se mahfuz bhala kya rahte

yuun to daman ko bahut ham ne bachana chaha

teri yadon ke diye jalte rahe jalte rahe

andhiy.on ne to ka.i baar bujhana chaha

bas isi jurm pe naraz hain duniya vaale

apne ḳhvabon ka mahal ham ne banana chaha

jo uTha us ko girane ki to sochi sab ne

jo gira us ko na duniya ne uThana chaha

qasr-o-aivan ka girana to koi baat na thi

ka.aba-e-dil ko bhi kuchh logon ne Dhana chaha

jab bhi socha ki haqiqat na chhupa.en ‘qadir’

ham se duniya ne naya koi bahana chaha