Sarmad Sahbai
vahi zamin vahi sar pe asman nikla
safar ke paar bhi ik dasht-e-ra.egan nikla
jo is ko dekha to tasvir ban ga.iin ankhen
ye jagta hua pal ḳhvab-e-be-karan nikla
ravan the ham to safar par charagh-e-hosh liye
magar sabat-e-jahan kar-e-na-gahan nikla
uḌi qaba-e-sikandar ghubar-e-nisyan men
tulu-e-saghar-e-jam shola-e-guman nikla
kahin tha shor-e-takallum kahin thi ḳhamoshi
jo ham-kalam tha ham se vo darmiyan nikla
use chhua to vo gum ho gaya hava ki tarah
ajab nazara tha zahir men bhi nihan nikla
fusun-e-ishq qimar-e-havas-gari Thahra
tamam girya-e-jan zeb-e-dastan nikla
kahin hai dasht-e-halakat kahin hai hairani
tiri talash men ye rasta kahan nikla
bas ik galim-e-suḳhan dosh-e-umr thi ‘sarmad’
usi ke tar-e-shikasta se la.al-e-jan nikla
Leave a Reply