Tanweer Gauhar
ishq kya shai hai dost kya kahiye
ḳhub-surat si ik ḳhata kahiye
sab ke apne muamle hain janab
kis ko achchha kise bura kahiye
nuur us ka zuhur us ka hai
dekhiye aur marhaba kahiye
saari duniya laga chuki tohmat
aap bhi mujh ko bevafa kahiye
har maraz ka ilaaj mumkin hai
dard-e-dil ki hai kya dava kahiye
naam jab likh di zindagi mere
kis liye phir hai fasla kahiye
jis ne luuTa hai chain ‘gauhar’ ka
naam kya luun bas ashna kahiye
Leave a Reply