Quaiser Khalid
tazkire fahm o ḳhirad ke to yahan hote hain
aql ki had se magar aage guman hote hain
chhoḌ jaate hain kahin paas tire apna vajud
ghar pahunch kar bhi to ham ghar men kahan hote hain
ḳhvab o ummid, guman, us ka tasavvur, chahat
talḳhi-e-zist men ye rahat-e-jan hote hain
kis tarah arz-guzari se unhen roka hai
aise jazbe ki jo chhupte na ayaan hote hain
ishq men tarz-e-takallum ki rivayat hai ajab
kalma-e-ḳhas nigahon se bayan hote hain
ḳhvab jab jab hue zaḳhmi to hue sher na.e
varna ye mo.ajaze har roz kahan hote hain
sirf pindar-e-ḳhirad hi to nahin shaghl-e-hayat
matam-e-ilm-o-amal bhi to yahan hote hain
saḳhti-e-hashr se honge na kisi taur bhi kam
un ke ham-rah vo lamhe jo giran hote hain
atish-e-dil hai ya phir sozish-e-jan hai, kya hai?
ek ik kar ke sabhi ḳhvab dhuan hote hain
nasl-e-nau ke hain na.e shughl, na.i hi tahzib
bazm-e-imroz men azkar-e-butan hote hain
akasr auqat tabahi ka sabab huun, lekin
kuchh havadis bhi magar vaj.h-e-aman hote hain
umr bhar khul nahin paate hain rumuz-o-asrar
log kuchh samne rah kar bhi nihan hote hain
barha TuuT ke bhii, hain kahin maujud abhi
valvale vo jo tire saath javan hote hain
ham ko to mil na sake, tum ko mile honge kahin
vo jo har haal men paband-e-zaban hote hain
kya kaha us ne, ye kya kah ke pukara ‘ḳhalid’
aise kuchh jumle ada vaqt-e-azan hote hain
Leave a Reply