Hashim Raza Jalalpuri
tire ḳhayal tiri aarzu se duur rahe
navab ho ke bhi ham lucknow se duur rahe
badan ke zaḳhm to charagaron ne si Daale
magar ye ruuh ke chhale rafu se duur rahe
zamin pe Tapka to ye inqalab la.ega
use bata do, vo mere lahu se duur rahe
kiya hai ham ne tayammum bhi ḳhak-e-maqtal par
namaz-e-ishq paḌhi aur vuzu se duur rahe
miri zaban ka charcha tha asmanon par
zamin vaale miri guftugu se duur rahe
Leave a Reply