zikr ghairon se tumhara nahin hoga mujh se
ye ta.aruf bhi gavara nahin hoga mujh se
mere maula miri ankhon men samundar de de
chaar bundon pe guzara nahin hoga mujh se
dauḌta hai meri rag rag men mohabbat ka lahu
dushmanon se bhi kinara nahin hoga mujh se
mere iḳhlas ki yarab tu saza mat dena
ye hasin jurm dobara nahin hoga mujh se
jo haqiqat men mira dushman-e-jan hai ‘ishrat’
hijr us ka bhi gavara nahin hoga mujh se
Leave a Reply