suljhi hui paheli ka uljhao dekh kar
hairan huun main ab tira bartav dekh kar
qismat ki baat aur hai lekin haqiqatan
dariya se ḳhauf aata nahin naav dekh kar
ham husn ashk hijr hare zaḳhm laa.e hain
aao ḳharid lo koi gham bhaav dekh kar
ye dil hai mera dil koi un ki dukan nahin
bikhre paḌe hain ja-ba-ja ḳhvab aao dekh kar
is zaḳhm ka nishan mahakta hai aaj bhi
rakkhe the tum ne honT jahan ghaav dekh kar
ye log ḳhvab luTne valon ke saath the
aansu baha rahe hain jo bikhrao dekh kar
ab kin tavahhumat se ghabra ga.i ‘ufuq’
pahle tumhen kaha tha sanbhal jaao dekh kar
Leave a Reply