ahl-e-gham se ishrat-e-alam ka saman ho gaya
jab zamin ki daagh ubhar aa.e gulistan ho gaya
apni had se baḌh ke jaata kis taraf ko dil mira
jaan paḌte hi ye musht-e-ḳhak be-jan ho gaya
ishq ke ba.ad ab havadis ki zarurat kya rahi
asman dam le mire marne ka saman ho gaya
hashr men pahchan kar qatil ka munh takne laga
jab zarurat hosh ki dekhi to hairan ho gaya
ḳhuftagan-e-ḳhak kitna be-mahal so.e ki ab
majma-e-ahbab ik ḳhvab-e-pareshan ho gaya
inqalab aa kar madad dete hain istedad ko
karvaTen badlen lahu ne aur insan ho gaya
rasta vahshat ko aḳhir mil gaya tangi men bhi
ye gareban tha jo do hathon men daman ho gaya
vus.at-e-sahn-e-jahan kuchh kam na thi ai ishq dost
kyuun ghaTa itna ki dil valon ko zindan ho gaya
baghban ki raa.e men main be-haqiqat tha magar
ba.ad mere ashiyan dagh-e-gulistan ho gaya
ruk chala hai beach men ḳhanjar ilahi ḳhair ho
dam na niklega agar qatil pasheman ho gaya
ek qatra bahr-e-isyan ka tha jo yuun sar chaḌha
palte palte daman-e-alam men tufan ho gaya
jab koi aansu mizha par aa ke chamka sham-e-gham
main ye samjha sub.h ka taara numayan ho gaya
shukr shane ka karun ya sabr ko DhunDun kahin
zulf to simTi magar haan dil pareshan ho gaya
kam se kam par aaj raazi hain shahidon ke mazar
aap hans denge to samjhenge charaghan ho gaya
jis men lakhon phuul the ‘saqib’ vo bagh-e-dil-kusha
ek hi gardish men gardun ki bayaban ho gaya
Leave a Reply