poet

Kaun Se Din Teri Yaad Ai But-E-Saffak Nahin

kaun se din tiri yaad ai but-e-saffak nahin

kaun si shab hai ki khanjar se jigar chaak nahin

lutf-e-qatil men taammul nahin par kya kiije

sar-e-shorida mira qabil-e-fitrak nahin

tujh par ai dilbar-e-alam jo har ik marta hai

is liye marne se mere koi ghamnak nahin

dil hua paak to phir kaun nazar karta hai

aur dil paak nahin hai to nazar paak nahin

ilm aur jahl men kuchh farq na ho kya maani

ham bhi bebak hain par ghair se bebak nahin

qais ko fazl-e-taqaddum hai vagarna yaan kya

sar-e-shorida nahin ya jigar-e-chak nahin

ma-siva allah na rahe ‘shefta’ hargiz dil men

khusravi kaakh saza-e-khas-o-khashak nahin

More Poems

Leave a Comment